Fact Check: လေကြောင်းတိုက်ခိုက်မှုရပ်ပြီး လက်ဝှေ့ကြိုးဝိုင်းထဲမှာ ထိုးသတ်ဖို့ မြန်မာစစ်တပ်ကို ဘရော်နီကာ စိန်ခေါ်မှုဓာတ်ပုံလား - မဟုတ်ပါ

“အမည်မသိ ရှေ့စာဆို”အမည်နဲ့ ဖေ့စ်ဘွတ်စာမျက်နှာက ဖြန့်ဝေခဲ့ပြီး ပျံ့နှံ့မှုအားကောင်းခဲ့တဲ့ ဖေ့စ်ဘွတ်ပို့စ်ပါ စာသား ကောက်နုတ်ချက်နဲ့ စခရင်ရှော့ ဓာတ်ပုံကို အောက်မှာကြည့်ပါ။ တူညီတဲ့ ဖြန့်ဝေမှုတွေကို ဒီနေရာ၊ ဒီနေရာနဲ့ ဒီနေရာမှာလည်းတွေ့ရတယ်။

“အားပေးရကြိုးနပ်တဲ့ Idoi” (မူရင်းအရေးအသား)လို့ ရေးသားပြီး ဓာတ်ပုံထဲမှာတော့ ဘရော်နီကာက “လေယာဉ်နဲ့မတိုက်နဲ့ သွေးရှိရင် ကြိုးဝိုင်းပေါ်တက်ခဲ့”လို့ ရေးသားထားတဲ့ အဖြူရောင်ဆိုင်းဘုတ်ကို ကိုင်ဆောင်ထားပါတယ်။

မူရင်းလင်ခ့် – Fb link | Archive link

အချက်အလက်စိစစ်ချက်

ဓာတ်ပုံကို Google မှာ ပုံရှာနည်း အသုံးပြုပြီး ရလာဒ်တွေကို ရှာဖွေကြည့်ရာမှာ ဒီဓာတ်ပုံဟာ မြန်မာစစ်တပ် အာဏာသိမ်းစ ၂၀၂၁ ခုနှစ် ဖေဖော်ဝါရီလထဲမှာ ကယန်းလက်ဝှေ့မယ် ဘရော်နီကာက စစ်တပ်ကို လက်နက်အားကိုးနဲ့ မိုက်မဲမှုအစား လက်ဝှေ့ကြိုးဝိုင်းထဲမှာ သူနဲ့ ယှဉ်ပြိုင်ထိုးသတ်ဖို့ စိန်ခေါ် ဆန္ဒပြခဲ့တဲ့ ဓာတ်ပုံဖြစ်တာတွေ့ရပါတယ်။ ဒါပေမဲ့လည်း ယခုရက်ပိုင်းတွေမှာ မြန်မာစစ်တပ်က နိုင်ငံအနှံ့မှာ တော်လှန်ရေးအင်အားစုတွေ ထိန်းချုပ်ထားတဲ့ နေရာတွေကို ပစ်မှတ်ထားပြီး လေကြောင်းတိုက်ခိုက်မှုတွေ အရှိန်မြှင့်လုပ်ဆောင်လာချိန်မှာ အခုလိုမျိုး လိုအပ်သလို ပြုပြင်ပြောင်းလဲ ဖြန့်ဝေလာခြင်းဖြစ်တာတွေ့ရပြီး ဒီဓာတ်ပုံကိုပဲ စစ်တပ်ကို ထောက်ခံ့တဲ့ ဝါဒဖြန့်ချိ ရေးအချို့မှာတော့ PDF တွေကို မထောက်ပံ့ဖို့ဆိုပြီးတော့လည်း ပြုပြင်ပြောင်းလဲခဲ့တာတွေ့ရပါတယ်။

မူလ ဓာတ်ပုံစာသားကတော့ “လက်နက်အားကိုးနဲ့ မမိုက်နဲ့ သွေးရှိရင် ကြိုးဝိုင်းပေါ်တက်ခဲ့”ဖြစ်တာတွေ့ ရပါတယ်။ ဒီလင့်ခ်နဲ့ ဒီလင့်ခ်တွေမှာ ကြည့်ပါ။

ပြုပြင်ပြောင်းလဲထားတဲ့ ဓာတ်ပုံ(ဘယ်)နဲ့ မူလဓာတ်ပုံ(ညာ)ကို အောက်ပါအတိုင်းယှဉ်ကြည့်ပါ။

သုံးသပ်ချက်

မူလဓာတ်ပုံမှာ စစ်တပ်အာဏာသိမ်းအပြီးမှာ ကယန်းလက်ဝှေ့မယ် ဘရော်နီကာက လက်နက်အားကိုးနဲ့ မမိုက်ဘဲ လက်ဝှေ့ကြိုးဝိုင်းမှာ ထိုးသတ်ဖို့ စစ်တပ်ကို စိန်ခေါ်ခဲ့တဲ့ ဓာတ်ပုံဖြစ်ပြီး စစ်တပ်က လေကြောင်း တိုက်ခိုက်မှုတွေပိုမို လုပ်ဆောင်လာချိန်မှာ လိုအပ်သလို ပြုပြင်မျှဝေထားခြင်းဖြစ်တယ်။