ဗုဒ္ဓဘာသာဝင်တွေ ဉပုသ်စောင့်၊အလှူပေးနဲ့ အခြားဝေယျဝစ္စဆောင်ရွက်လိုပါက ရပ်ကွက်ရုံးနဲ့ ဗလီဆရာများ ထောက်ခံချက်ရမှ ခွင့်ပြုတော့မယ်လို့ လူမှုကွန်ယက်မှာ ရေးသားမျှဝေနေတာတွေ့ရပါတယ်။
ဖြန့်ဝေတဲ့ပို့စ်မှာ သာသနာရေးနှင့်ယဉ်ကျေးမှုဝန်ကြီးဌာန ပြည်ထောင်စုဝန်ကြီး သူရဉီးအောင်ကိုပုံနှင့်တကွ ဗုဒ္ဓဘာသာဘုန်းကြီးကျောင်းများသို့ ဗုဒ္ဓဘာသာဝင်များသွားရောက် ဉပုသ်စောင့်၊အလှူပေးနဲ့ အခြားဝေယျဝစ္စ ဆောင်ရွက်လိုပါက ရပ်ကွက်ရုံး သို့မဟုတ် ဗလီဆရာများ သို့မဟုတ် ဘာသာပေါင်းစုံငြိမ်းချမ်းရေးအဖွဲ့များထံမှ ထောက်ခံချက်ယူပြီးမှ သွားခွင့်ပြုတော့မည်ဟု သာသနာရေးဝန်ကြီးဌာနမှ အမိန့်ထုတ်ပြန်တော့မယ်လို့ ရေးသားထားပါတယ်။
လူမှုကွန်ယက်အသုံးပြုသူများကို နားလည်မှုလွဲစေနိုင်တဲ့ အရေးအသားနဲ့ ပို့စ်ကို အောက်ပါအတိုင်းတွေ့ရပါတယ်။
မူရင်းလင်ခ့် – Fb link | Archive link
အချက်အလက်စိစစ်ချက်
အခုလိုရေးသားမျှဝေနေတာနဲ့ပတ်သက်ပြီး သာသနာရေး နှင့်ယဉ်ကျေးမှုဝန်ကြီးဌာနသာသနာရေးဦးစီးဌာန ညွှန်ကြားရေးမှူး ဦးအောင်ဆန်းဝင်းကို Fact Crescendo Myanmar ကို ဆက်သွယ်အတည်ပြုရာမှာ အောက်ပါ အတိုင်းပြောပါတယ်။
“မဟုတ်ပါဘူး။ သတင်းမှားပါ။ ကျွန်တော်တို့ ထုတ်ပြန်ထားတာမရှိပါဘူး။ အဲဒါသတင်းအမှားပါ။ ကျွန်တော်တို့ ထုတ်တဲ့ သတင်းတွေကို သိချင်ရင် ကျွန်တော်တို့ ဝက်ဘ်ဆိုဒ်တွေကို ဝင်ကြည့်ပါ။ ဝန်ကြီးဌာနရဲ့ ဝက်ဘ်ဆိုဒ်ကို ဝင်ကြည့်ပါ”
ဒီလိုရေးသားမျှဝေနေ ဓာတ်ပုံပို့စ်ဟာ သတင်းအမှားဟာ ရွေးကောက်ပွဲအတွက်ရည်ရွယ်ပြီး ပြီးခဲ့တဲ့လများ အတွင်းမှာလည်း လူမှုကွန်ယက်မှာ ဖြန့်ဝေခဲ့တာ တွေ့ရပါတယ်။
သုံးသပ်ချက်
ဗုဒ္ဓဘာသာဝင်များသွားရောက် ဉပုသ်စောင့်၊အလှူပေးနဲ့ အခြားဝေယျဝစ္စ ဆောင်ရွက်လိုပါက ရပ်ကွက်ရုံး သို့မဟုတ် ဗလီဆရာများ သို့မဟုတ် ဘာသာပေါင်းစုံငြိမ်းချမ်းရေးအဖွဲ့များထံမှ ထောက်ခံချက်ယူပြီးမှ သွားခွင့်ပြုတော့မည်ဟု သာသနာရေးဝန်ကြီးဌာနမှ အမိန့်ထုတ်ပြန်မယ်ဆိုတာ မဟုတ်ပါဘူး။
Title:Fact Check: ဉပုသ်စောင့်၊ အလှူလုပ်ဖို့ ဘုန်းကြီးကျောင်းသွားရင် ထောက်ခံချက်ရမှ သွားရမယ်လို့ သတင်းမှားဖြန့်ဝေ
Fact Check By: နေရာမောင်Result: False
