Fact Check: ဝေလငါးလေ့ကျင့်ရင်း သေဆုံးခဲ့ရတဲ့ ဂျက်စီကာ ရက်ဒ်ကလစ် ဗွီဒီယိုက တကယ့်အဖြစ်အပျက် မဟုတ်ပါ 

လူမှုရေး

ဝေလငါးအလှပြဖို့ လေ့ကျင့်ရင်း ဝေလငါး လေ့ကျင့်ရေးကျွမ်းကျင်သူ ဂျက်စီကာ ရက်ခ်ကလစ်(Jessica Radcliffe) သေဆုံးခဲ့ရတယ်ဆို ဗွီဒီယိုတခု လူမှုကွန်ယက်မှာ  ပျံ့နှံ့မှု အားကောင်းခဲ့ တာတွေ့ရတယ်။ နားလည်မှုလွဲမှာစေနိုင်တဲ့ ပြောဆိုမျှဝေမှုတွေသာဖြစ်တယ်။ ဒီဗွီဒီယိုဟာ အပြင်မှာ တကယ်ဖြစ်ပျက်ခဲ့တဲ့ အဖြစ်အပျက်မဟုတ်ဘဲ ဉာဏ်ရည်တုနည်းပညာအသုံးပြုပြီး စိတ်ကူးယဉ်ဖန်တီးထားတဲ့ ဖန်တီးမှုတခုသာဖြစ်တယ်။ 

ဒီလိုပြောဆိုဖြန့်ဝေခဲ့တဲ့ ဖေ့စ်ဘွတ်ပို့စ်တခုက ရယူထားတဲ့ စခရင်ရှော့ဓာတ်ပုံနဲ့ စာသားကောက်နုတ်ချက်ကို အောက်မှာကြည့်ပါ။ တူညီတဲ့ ရေးသားမျှဝေမှုကို ဒီနေရာမှာလည်း တွေ့ရပါတယ်။

Original link | Archive link

အချက်အလက်စိစစ်ချက်

ဖေ့စ်ဘွတ်၊ တစ်တော့နဲ့ ယူကျူ့မှာ အများအပြားပျံ့နှံ့ခဲ့တဲ့ ဝေလငါးတကောင်က လေ့ကျင့်ရေးအမျိုးသမီးတဦးကို တိုက်ခိုက်သတ်ဖြတ်လိုက်တဲ့ ဒီဗွီဒီယိုနဲ့ ပတ်သက်ပြီး အချက်အလက်စိစစ်တဲ့ အဖွဲ့အစည်းအတော်များများက အချက်အလက်စိစစ်ဖော်ပြခဲ့ပြီးဖြစ်တယ်။ သီရိလင်္ကာအခြေစိုက် Fact Crescendo ရဲ့ အချက်အလက် စိစစ်ချက်ကို ဒီလင့်ခ်မှာ ကြည့်ပါ။ 

Jessica Radcliffe အမည်နဲ့ ဝေလငါးလေ့ကျင့်ရေး သင်တန်းဆရာတယောက်ဆိုတဲ့ သက်သေအထောက် အထားကို မတွေ့ရှိခဲ့ရသလို ယုံကြည်ရလောက်တဲ့ သတင်းအရင်းအမြစ်တွေမှာလည်း မတွေ့ရပါဘူး။ ဒီလိုအဖြစ်အပျက်မျိုးရှိခဲ့တယ်ဆိုတဲ့ သတင်းအဖြစ်အပျက်လည်း  မတွေ့ရှိရပါ။

ဒီလိုပဲ တူညီတဲ့ ဖြစ်စဉ်ကို ပြောပြနေပေမဲ့ တချို့မှာ ဂျက်စီကာရဲ့ နောက်ဆုံးခရီးလို့ ဖော်ပြလိုက်၊ တချို့နေရာတွေမှာ ဂျက်စီကာမသေဘူးလို့ ဖော်ပြလိုက်နဲ့ တွေ့ရသလို ဂျက်စီကာ ဝေလငါးကိုက်သတ်ခံရဆိုတဲ့ ‌ ပြောဆိုချက် တူညီပေမဲ့ ရုပ်မတူတာတွေလည်း တွေ့ရပါတယ်။ 

 AI နဲ့ ပြုလုပ်ထားတာဟုတ်မဟုတ် ခွဲခြမ်းစိတ်ဖြာနိုင်တဲ့ ပလက်ဖောင်းဖြစ်တဲ့ Sightengine မှာ ဒီ Jessica Radcliffe ရဲ့ ဓာတ်ပုံတွေကို ခွဲခြမ်းစိတ်ဖြာစေရာမှာ ဉာဏ်ရည်တုဖြင့် ဖန်တီးထားတာကို တွေ့ရပါတယ်။ 

သုံးသပ်ချက်ဝေလငါးက လေ့ကျင့်ပေးသူကို တိုက်ခိုက်သတ်ဖြတ်တယ်ဆိုတဲ့ ဗွီဒီယိုဟာ ဉာဏ်ရည်တု နည်းပညာ အသုံးပြု ဖန်တီးထားခြင်းသာဖြစ်ပြီး အပြင်မှာ အမှန်တကယ်ဖြစ်ပျက်ခဲ့တဲ့ အဖြစ်အပျက်တခုမဟုတ်တာတွေ့ရပါတယ်။ ဒီလိုပဲ ဗွီဒီယိုထဲပါ ဂျက်စီကာ ရက်ခ်ကလစ်အမည်နဲ့ အခုလို ဝေလငါးလေ့ကျင့်ပေးသူအနေနဲ့လည်း မတွေ့ရပါဘူး။

Avatar

Title:Fact Check: ဝေလငါးလေ့ကျင့်ရင်း သေဆုံးခဲ့ရတဲ့ ဂျက်စီကာ ရက်ဒ်ကလစ် ဗွီဒီယိုက တကယ့်အဖြစ်အပျက် မဟုတ်ပါ 

Fact Check By: နေရာမောင် 

Result: False