Fact Check: မန္တလေး အိုးဘိုထောင်ကို PDF တွေ ဝင်စီးတဲ့ သတင်းတု

မန္တလေး အိုးဘိုထောင်ကို PDF တွေ ဝင်စီးပြီး ထောင်သားအားလုံးလွတ်လာတယ် ဆိုတဲ့ ဗွီဒီယိုပို့စ်တခု ယူကျူ့အသုံးပြုသူတွေအကြားမှာ ပျံ့နှံ့မှုအားကောင်းလျှက်ရှိပါတယ်။ သတင်းတု ဖြန့်ချိနေခြင်းဖြစ်တယ်။

ပျံ့နှံ့မှုအားကောင်းနေတဲ့ ဗွီဒီယိုပို့စ်ပါစာသားကောက်နုတ်ချက်နဲ့ စခရင်ရှော့ဓာတ်ပုံကို အောက်မှာ ကြည့်ပါ။

“မနက်အထူးသတင်းကြီး

မန္တလေးအိုးဘိုထောင် PDF မီးရှို့ပြီ

ထောင်မှူးနဲ့ရဲခွေးတွေကိုလည်ပင်းကြိုးစွပ်ပြီး

ထောင်ပေါက်ဝမှအကုန်ချိတ်ဆွဲထားလိုက်ပြီ”

မူရင်းလင်ခ့် – Youtube link | Archive link

အချက်အလက်စိစစ်ချက်

သတင်းလုပ်ငန်းအဓိကလုပ်ကိုင်နေတဲ့ မီဒီယာတွေမှာ ဒီသတင်းဖော်ပြချက်မရှိပါဘူး။ ဗွီဒီယိုကို ဖြန့်ဝေထားတဲ့ “Yangon Khit Thit”အမည်နဲ့ ယူကျူ့ချန်နယ်ကိုကြည့်မယ်ဆိုရင် မီဒီယာတချို့မှာဖော်ပြခဲ့ပြီးဖြစ်တဲ့ သတင်းတွေကို သတင်းခေါင်းစဉ်တု ဒါမှမဟုတ် ခေါင်းစဉ်လွဲတွေတပ်ကာ ဆက်တိုက်ဖြန့်ချိနေတာတွေ့ရပါတယ်။ လက်ရှိအချိန်မှာတော့ ဒီချန်နယ်ဟာ စလော့ဂိမ်းတွေကို ကြော်ငြာပေးတဲ့နေရာအဖြစ် ပြောင်းလဲထားပါတယ်။

ဩဂုတ် ၅ ရက်မှာ ဖြန့်ဝေခဲ့တဲ့ ဒီဗွီဒီယိုထဲမှာ တကယ်တမ်းဖော်ပြထားတဲ့အကြောင်းအရာတွေဟာ ရွှေဖီမြေ သတင်းဌာနကဖော်ပြခဲ့တဲ့ “လားရှိုး အကျဉ်းထောင်က အကျဉ်းသားတွေ ကိုယ့်နည်းကိုယ့်ဟန် ထောင်ဖောက် လွတ်မြောက်လာခြင်းဖြစ်ပြီး တိုက်ပွဲကြားမှာ အကျဉ်းသား ၁၀၀ ကျော်သေဆုံး၊ ၈၀၀ ကျော် ပျောက်ဆုံးနေ”ဆိုတဲ့ သတင်းနဲ့ ဘလော့ဂါတဦးရေးသားတဲ့ “ရမခ ကျအပြီး အဘ ပါတော်မူမလား”ဆိုတဲ့ အတွေးအမြင်ဆောင်းပါးကို ပြန်လည်ဖတ်ကြားနေခြင်းဖြစ်တယ်။

သုံးသပ်ချက်

မန္တလေးအိုးဘိုထောင်ကို PDF တွေဝင်စီးတဲ့အကြောင်း အထောက်အထားမရှိပါဘူး။ ဗွီဒီယိုထဲမှာ‌ဖော်ပြခဲ့တဲ့ သတင်းဟာ လားရှိုးမြို့သိမ်းတိုက်ပွဲအတွင်းမှာ လားရှိုး အကျဉ်းထောင်က အကျဉ်းသားတွေ ကိုယ့်နည်းကိုယ့်ဟန် ထောင်ဖောက် လွတ်မြောက်လာပြီး တိုက်ပွဲကြားမှာ အကျဉ်းသား ၁၀၀ ကျော်သေဆုံးခဲ့တဲ့ သတင်းကို သတင်းခေါင်းစဉ်တုတပ်ထားခြင်းဖြစ်တယ်။

ပြောဆိုချက်- မန္တလေးအိုးဘိုထောင်ကို PDF တွေဝင်စီး၊ အကျဉ်းသားအားလုံးလွတ်မြောက်