လူမျိုးတုံးသတ်ဖြတ်မှုအတွက် မြန်မာစစ်ဗိုလ်ချုပ်တွေကို ICC သေဒဏ်ပေးလိုက်တယ်ဆိုတဲ့ ဗွီဒီယိုတွေ ယူကျူ့မှာ ပျံ့နှံ့မှု အားကောင်းလျက်ရှိတယ်။ နားလည်မှုလွဲမှာစေနိုင်တဲ့ ပြောဆိုမျှဝေမှုတွေသာဖြစ်တယ်။
ပျံ့နှံ့မှုအားကောင်းနေတဲ့ ဖေ့စ်ဘွတ်ပို့စ်က ရယူထားတဲ့ စခရင်ရှော့ဓာတ်ပုံနဲ့ စာသားကောက်နုတ်ချက်ကို အောက်မှာကြည့်ပါ။ အလတူးတဲ့ ရေးသားမျှဝေမှုတွေကို ဒီနေရာမှာလည်း တွေ့ရပါတယ်။
အချက်အလက်စိစစ်ချက်
ဗွီဒီယိုဖြန့်ဝေထားတဲ့ “Khit Thit Media”အမည်နဲ့ ယူကျူ့ချန်နယ်ဟာ သတင်းမီဒီယာတချို့က သတင်းတွေကို ကူးယူဖော်ပြပြီး သတင်းခေါင်းစဉ်တုတပ်ကာ ပြန်လည်ဖြန့်ချိတာတွေ့ရတယ်။ ဒီယူကျူ့ချန်နယ်ဟာ ရန်ကုန်ခေတ်သစ်သတင်းဌာနရဲ့ ယူကျူ့ချန်နယ်နာမည်ကိုလည်း ဆင်တုယိုးမှား တုပပြီး သတင်းမီဒီယာတချို့မှာ ဖော်ပြခဲ့ပြီး သတင်းတွေကို အခုလို သတင်းခေါင်းစဉ် တုတပ်ဖြန့်ချိနေခြင်းဖြစ်တယ်။ ဒီချန်နယ်နဲ့ ပတ်သက်ပြီး Fact Crescendo Myanmar အနေနဲ့မကြာခဏ အချက်အလက်စိစစ်ဖော်ပြခဲ့ပြီးဖြစ်တယ်။
အခုလည်း ဗွီဒီယိုထဲမှာ ဖော်ပြထားတဲ့အကြောင်းအရာဟာ ရန်ကုန်ခေတ်သစ်သတင်းဌာနက ဖော်ပြခဲ့တဲ့ “စစ်တပ်၏ ရိုဟင်ဂျာလူမျိုးတုန်းသတ်ဖြတ်မှု ၈ နှစ်ပြည့်ချိန် မင်းအောင်လှိုင်နှင့် စစ်ခေါင်းဆောင်များကို နိုင်ငံတကာတရားရုံးရှေ့ မှောက် ခေါ်ဆောင်ရန် SAC-M တိုက်တွန်း၊ ဗြိတိန်က တရားမျှတမှု ရရှိရေး ဆက်ပံ့ပိုးမည်”ဆိုတဲ့ သတင်းကို လိုအပ်သလို ခေါင်းစဉ်တုတပ်ထားခြင်းဖြစ်တယ်။
၉ မိနစ်ကျော်ရှည်လျားတဲ့ ဒီဗွီဒီယိုထဲမှာ နောက်ထပ် “ထိန်းချုပ်နယ်မြေမှာ စစ်ကောင်စီက ဖိအားပေး ရွေးကောက်ပွဲလုပ်ပါက ထိရောက်စွာ အရေးယူမည်ဟု NUG ပြော”၊ “အောင်ဇေယျစစ်ကြောင်း အပါအဝင် သေလမ်းကို ဖြတ်လျောက်ကြသူများ”စတဲ့ သတင်းတွေကို ဖော်ပြထားတယ်။
သုံးသပ်ချက်
“Khit Thit Media”ယူကျူ့ချန်နယ်ဟာ ရန်ကုန်ခေတ်သစ်သတင်းဌာနရဲ့ ယူကျူ့အမည်နာမကို တုပထားပြီး သတင်းမီဒီယာတချို့က သတင်းတွေကို ကူးယူဖော်ပြကာ သတင်းခေါင်းစဉ်တုတပ် ဖြန့်ချိတဲ့နေရာဖြစ်တယ်။ မြန်မာစစ်ဗိုလ်ချုပ်တွေကို ICC သေဒဏ်ပေးလိုက်တယ်ဆိုတဲ့ အထောက်အထား မတွေ့ရပါဘူး။
ပြောဆိုချက်- မြန်မာစစ်တပ်ဗိုလ်ချုပ်တွေကို သေဒဏ်ပေးဖို့ ICC အမိန့်ချ
Title:Fact Check: မြန်မာစစ်တပ်ဗိုလ်ချုပ်တွေကို သေဒဏ်ပေးဖို့ ICC အမိန့်ချတဲ့ သတင်းတု
Fact Check By: နေရာမောင်Result: False
