သမ္မတဟောင်းဦးသိန်းစိန်နဲ့ စစ်အာဏာရှင်ဟောင်း ဦးသန်းရွှေ အဖမ်းခံရဆိုပြီး ဗွီဒီယိုတခု ယူကျူ့မှာ ဖြန့်ဝေခဲ့ရာ ပျံ့နှံ့မှုအားကောင်းလျှက်ရှိပါတယ်။ ရန်ကုန်ခေတ်သစ်သတင်းဌာနကဖော်ပြခဲ့တဲ့ သတင်းတွေကို သတင်းခေါင်း စဉ်လွဲတပ် ဗွီဒီယိုသာဖြစ်တယ်။
အောက်ပါစခရင်ရှော့ကတော့ ဒီလိုဆိုထားတဲ့ ယူကျူ့ဗွီဒီယိုတခုဖြစ်တယ်။
“Khit Thit အတည်ပြုကြေညာလိုက်ပြီ သိန်းစိန်နဲ့သန်းရွှေအဖမ်းခံရ အမြန်ဆုံးဝင်ကြည့်ကြပါ(စစ်အုပ်စု ၂ ခြမ်းကွဲကုန်ပြီ”စသည်ဖြင့် ရေးသားပြီး ယူကျူ့မှာဖြန့်ဝေထားတာဖြစ်တယ်။
မူရင်းလင်ခ့် – Youtube link | Archive link
အချက်အလက်စိစစ်ချက်
ဗွီဒီယိုပါအကြောင်းအရာတွေဟာ ရန်ကုန်ခတ်သစ်သတင်းဌာနကဖော်ပြခဲ့တဲ့ စက်တင်ဘာ ၂၈ ရက်မှာဖော်ပြခဲ့တဲ့ သတင်းတွေကို ပြန်လည်ဖတ်ကြားနေခြင်းသာဖြစ်ပြီး သတင်းတွေထဲမှာ သမ္မတဟောင်း ဦးသိန်းစိန်အဖမ်းခံရ တဲ့အကြောင်း သို့မဟုတ် စစ်အာဏာရှင်ဟောင်း ဦးသန်းရွှေအဖမ်းခံရတဲ့အကြောင်း မပါဝင်ပါဘူး။
တကယ်တမ်း ဗွီဒီယိုထဲမှာ “ချင်းတွင်းမြစ်ကမ်း တစ်လျှောက်ရှိ ကျေးရွာများကို စစ်တပ်၏ ရေယာဥ်အုပ်စုက လက်နက်ကြီးများဖြင့် ပစ်ခတ်မှုကြောင့် ပြည်သူများ ထွက်ပြေးတိမ်းရှောင်နေရ”၊ “သားဖြစ်သူ အောင်ပြည့်စုံကို ဆောက်လုပ်ခွင့်ချပေးခဲ့သော ပြင်ဦးလွင် ကုတင် ၇၀၀ ကင်ဆာ စစ်ဆေးရုံကို အဖေဖြစ်သူ မင်းအောင်လှိုင်က အခမ်းအနားဖြင့် ဖွင့်လှစ်မည်”၊ “တရုတ်-မြန်မာနယ်နယ်စပ်အနီးတွင် အွန်လိုင်းငွေလိမ်ရာဇဝတ်ဂိုဏ်းများ၏ လူကုန်ကူးမှုများကို တားဆီးရေး ကန့်သတ်ဇုန်တစ်ခုကို တရုတ်အစိုးရက ထူထောင်မည်”စတဲ့ သတင်းတွေကို ဖော်ပြထားခြင်းဖြစ်တယ်။
သုံးသပ်ချက်
သမ္မတဟောင်းဦးသိန်းစိန်နဲ့ စစ်အာဏာရှင်ဟောင်း ဦးသန်းရွှေ အဖမ်းခံရဆိုတာမဟုတ်ပါဘူး။ ရန်ကုန်ခေတ်သစ် သတင်းဌာနက စက်တင်ဘာ ၂၈ ရက်မှာ ဖော်ပြခဲ့တဲ့ သတင်းအချို့ကို သတင်းခေါင်း စဉ်လွဲတပ်ပြီး ပြန်လည် ဖြန့်ချိထားခြင်းသာဖြစ်တယ်။
ပြောဆိုချက်- သမ္မတဟောင်းဦးသိန်းစိန်နဲ့ စစ်အာဏာရှင်ဟောင်း ဦးသန်းရွှေ အဖမ်းခံရ
Title:Fact Check: သမ္မတဟောင်းဦးသိန်းစိန်နဲ့ စစ်အာဏာရှင်ဟောင်း ဦးသန်းရွှေ အဖမ်းခံရဆိုတဲ့ သတင်းတု
Written By: Zun ZeeResult: False
