ပြည်ထောင်စုလွှတ်တော်ကိုယ်စားပြုကော်မတီ(CRPH)အပါအဝင် အမျိုးသားညီညွှတ်ရေးအစိုးရ(NUG)နဲ့ ဆွေးနွေးလိုတယ်လို့ စစ်ကောင်စီက ကြေညာတယ်ဆိုပြီး ဗွီဒီယိုတခု ယူကျူ့မှာ ဖြန့်ဝေထားရာမှာ ပျံ့နှံ့မှု အားကောင်းလျက်ရှိတယ်။ သတင်းတုတခုသာဖြစ်တယ်။
ပျံ့နှံ့မှုအားကောင်းနေတဲ့ ယူကျူ့ဗွီဒီယိုက ရယူထားတဲ့ စခရင်ရှော့ဓာတ်ပုံနဲ့ စာသားကောက်နုတ်ချက်ကို အောက်မှာကြည့်ပါ။
“NUGနဲ့ ဆွေးနွေးလိုကြောင်း ကြေညာ
CRPHအပါအဝင် NUGနဲ့အလွတ်သဘော တွေ့ဆုံလိုကြောင်း
တရားဝင်ကြေညာ၊ NUG ပယ်ချလိုက်ပြီ”
အချက်အလက်စိစစ်ချက်
ပထမဆုံးအနေနဲ့ ဗွီဒီယိုကို ဖြန့်ဝေထားတဲ့ “Yangon Khit Thit”အမည်နဲ့ ယူကျူ့ချန်နယ်ကိုကြည့်မယ်ဆို မီဒီယာတချို့မှာ ဖော်ပြခဲ့ပြီးတဲ့အကြောင်းအရာတွေ လုပ်ကြံရေးသားထားတဲ့ သတင်းခေါင်းစဉ်တွေ တပ်ကာ ဗွီဒီယိုပုံစံနဲ့ ပြန်လည်ဖြန့်ဝေမှုတွေကို ပြုလုပ်တဲ့ နေရာဖြစ်တာတွေ့နိုင်တယ်။
အခုလည်း ဗွီဒီယိုထဲမှာပါတဲ့အကြောင်းအရာဟာ Myanmar Pressphoto Agency ကဖော်ပြခဲ့တဲ့ “NUG ၊ CRPH နှင့် NLD ခေါင်းဆောင်များ သတ္တိရှိပါက ပြည်တွင်းမှာ ပြန်နေရန် စစ်ကောင်စီ ထောက်ခံသူ ဒေါ်စန္ဒာမင်းစိန်ခေါ်” ဆိုတဲ့ သတင်းကို ခေါင်းစဉ်တုတပ်ထား တာတွေ့ရတယ်။
၉ မိနစ်ကျော်ရှည်လျားတဲ့ ဒီဗွီဒီယိုထဲမှာ နောက်ထပ်အကြောင်းအရာတွေကတော့ မြန်မာနောင်း သတင်းဌာနက ဖော်ပြခဲ့တဲ့ “လားရှိုးတွင် စစ်ကောင်စီတပ်အင်အား ထောင်ဂဏန်းနီးပါး ထပ်မံဖြည့်တင်း”၊ “ပေါက်မြို့နယ်ကို လေကြောင်းဗုံးကြဲ ၊ ပလဖ ဒုတာဝန်ခံ အပါအဝင် ၅ ဦး သေဆုံး”စတဲ့ သတင်းတွေကို ပြန်လည်ဖော်ပြထားတယ်။
သုံးသပ်ချက်
“Yangon Khit Thit”အမည်နဲ့ ယူကျူ့ချန်နယ်ဟာ မီဒီယာတချို့မှာဖော်ပြခဲ့တဲ့ သတင်းတွေကို ခေါင်းစဉ်တု တပ်ပြီး ဗွီဒီယိုပုံစံနဲ့ ပြန်လည် ဖြန့်ချိတယ်။ CRPH နဲ့ NUG ကို ဆွေးနွေးဖို့ စစ်တပ်က ကမ်းလှမ်းတယ်တာ၊ စစ်တပ်ရဲ့ ကမ်းလှမ်းချက်ကို NUG က ပယ်ချတယ်ဆိုတာလည်း အထောက်အထားမရှိပါဘူး။
ပြောဆိုချက်- CRPH အပါအဝင် NUGနဲ့အလွတ်သဘော တွေ့ဆုံလိုကြောင်း စစ်တပ်တရားဝင် ဖိတ်ခေါ်
Title:Fact Check: NUG နဲ့ဆွေးနွေးလိုကြောင်း စစ်တပ်ကြေညာတဲ့ သတင်းတု
Fact Check By: Zun ZeeResult: False
